Oggi Ada Lauzi compie 96 anni. Voglio ricordarla con queste sue poesie.
Gh’è chì la primavera (Ada Lauzi)
L’hoo vista stamattina sul poggioeu
quand hoo dervii i finester:
cantava el rossignoeu, cippava el passarin,
intant che duu pivion
beccaven di freguj sora on tombin…
L’è s’cioppada sui ramm e sora i sces,
sui piant del mè giardin
vestii de sô, de rosa e de biancor,
l’è s’cioppada sui tecc;
on butt, in d’on tollin, l’ha miss dò foeuj,
e germoeuj e germoeuj de vita noeuva…
Per strada, ona tosetta
de man al sò gin-gin,
l’ha faa la prima proeuva d’on basin,
che meraviglia!
Denter ona conchiglia, in “gestazion”
quaicoss che va dree a cress
e apress el nassarà o mas’c o tósa…
magari in pièna estaa…
L’è primavera, fiàden i ortesei
tutt verd e pettenaa…
insalatina fresca, ravanei,
content de vess cattaa…
L’è primavera fin dree di uss:
se netta, se pittura, se guarniss,
e la resgiora, per non vessa de men,
la truscia col guarneri:
scossaritt de slongà
la muda del resgiô…
e pagn d’inverno, foeura, a ciappà ‘l sô.
Te siet la benvegnuda
o benedetta, splendida stagion,
per quei che t’hann spettaa,
per quei che al tò rivà,
in fond al coeur, se senten pussee bon!
L’è ‘na preghiera fada in milanes con umiltà, fervor, senza pretes:
te preghi madonnina, per on’ora
fa ritornà Milan ‘me l’era allora…
e, per quell’ora, famm vedè i navilli,
i bei tosann coi sòcch fin’ai cavilli,
i “Gigi” con la gnaccia e intorna i fioeu
e sentì anmò el cantà di barchiroeu,
el vosattà di dònn in sul Verzee
e quell del Vicolin di lavandee!
O Madonnina, famm ‘sta carità.
per on’oretta sola famm tornà
ne la Milan di brumm e di cavai
quand sòtta Tì giugavom num bagaj,
e Te parevet alta in Paradis
coi gulli intorna, bianch come benis,
famm rivedè ‘ncamò i spazzacamin
con tutta la carisna sul faccin…
…el soo…l’è ‘na preghiera disperada… d’on coeur che ne pò pù de sta bugada… ma…quand de damm a trà Te avree decis… famm sarà i oeucc…e derva el Paradis
Ada Lauzi
