Un racconto in dialetto milanese dello scrittore Gianfranco Gandini
Mancava pòcch a Natal e la mia veggetta ( inscì ciami la mia mamma) la m’aveva domandaa, come regall, on golfin.
Se sa, i nòster vècc hinn abituaa a vardà i ròbb pratich e nò tutt quell che lor disen che l’è inutil.
Ma mì, come al sòlit, avaria vorsuu regalagh on quaicòss che ’l fudess minga staa el sòlit golfin, i sòlit sciavàtt e, allora, me s’era miss in dell coo de andà in “centro” per famm vegnì l’ispirazión.
Savevi giamò che poeu l’avaria barbottaa ma quel sò sorisett el faseva capì che in fond, in fond…
S’era ’rivaa quàsi a la fìn del cors Vittori Emanuell, quand vedi rivà el Luis, che de lontan el me faseva segn, per fass vedè.
El Luis… vècc amis, amis de semper. Anca se gh’avevom ona quaj idea diversa, andavom pròppi dacòrd; e fòrsi l’era pròppi quella nòstra diversitàa che la ghe voreva per tegnì inscì viva la nòstra amicizia: ona quaj bella discussion, ona volta ògni tant, e poeu, quasi semper tucc duu senza avè cambiaa idea, andavom per la nòstra strada, con la voeùja però de vedes prest.
“ Ciao, ’me te stee? ”
“ Ciao, mì ben e tì? Come mai da ’sti part? ”
“ Eh, son ciappà cont i regai de Natal, pensavi de comprà on regalin per la mia veggetta”
“ Si, bravo, la se merita pròppi on bel regall la Pina e dimm, la sta ben? “
“ Si, si, ògni tant la barbotta on poo ma pròppi quand la barbotta voeur dì che la sta bén…”
“ Te bevet on caffé? “
“ Ma si, va, intanta femm dò ciaccer e, a proposit, i tòstan bén? ’ste fee a Natal te vee dal tò fradell come l’ann passaa? “
“ Si, si, tutti bén …
E semm andaa avanti a cicciarà per on poo quand, per combinazion, vardi foeura e vedi on quaj fiòcch de nev che comincia a vegnì giò.
“ Varda Luis, fiòcca, ghe manca domà la nev per fa diventà el Natal pròppi…Natal. Si, perché la gent a Natal, la se sent pussée bòna, l’è cóme se in di ’sti fèst chì se … desedass on poo l’anema.”
“ L’anema la gh’è nò! “
“Come saria che l’anema la gh’è nò?”
“Te disi che la gh’è nò, possibìl che ‘na ròbba che la gh’è la se ved minga?”
“Ma ’ste diset Luis, anca…anca l’ària te la vedet nò, ma la gh’è!”
“Si, ma l’aria te la sentet e senza te moeuret”
“Ma anca l’anema te la … sentet, l’è come…l’è come el coeur, nò, pussée!!”
“Pussée de còssa? E poeu dimm come te fee a vess sicur?”
“Son sicur perché quand gh’hoo ’n’emozion la … senti”
“Ti te sentet on bèll nagòtt, quèll che te sentet l’è el coeur ch’el te batt fort!”
“Ma nò, ma nò, possìbil che te capiset nò la diferenza? la diferenza tra i sentiment, la bontàa e i emozion che te riven da ‘l de foeura?”
“Bhe! Se te see pròppi sicur voeùnna di ’sti ser famela trovà l’anema, inveci de cicciarà!”
“E ti allora, per dò o trè ser proeuva a trascurà la toa veggetta, cerca de sentì nò quand el bagai el piang e ‘l te ciama papà. E allora te vedaree che l’anema te la trovareet inscì, in de per tì!”
“Bhe, bhe, anema sì, anema nò, adess gh’hoo de andà, te auguri de passà i fèst in armonia, faggh i bonn fèst a la toa famìglia”.
“Ciào, augùri ànca a tì, se vedom dòpo i fèst”.
E sont andaa in quèll bell magazzìn che gh’è in piàzza del Dòmm e finalment son riessii a comprà on golfin e on collarin per la mia veggetta.
Savevi che poeu l’avaria barbottaa perché …”te spendet semper tròpp…” ma savevi anca che a la fìn gh’avaria faa piasè, e che a la prìma domenega, a la messa la gh’avaria dit ai sò amis che l’era el mè regall de Natal.
Adèss fioccava pussée fòrt, e cominciaven a restà giò i pedann in su la nev, ma poeu spariven subit, quasi come… l’ànema del Luis e siccome s’era sòtt’a la Madonnina ho provaa a sarà-su i oeucc per vess pussée concentràa, e gh’hoo faa ’na preghiéra:
“Proeuva tì, oh Madonnina, tì che te proteget i tò Milanéss, proeuva tì a dimm indovè che podi trovà l’anema del mè amis Luis, perchè credi che …l’abbia perduda e ch’el sia bon pù de trovalla, in mèzz a ’stórebellott, a ’stà confusion a ’stà povertà de valor che gh’è al dì d’incoeu, inscì ghe la foo trovà sòtt-a l’alber de Natal. Eh, si, credi che ’l saria el pussée bèll regall che podaria fagh , al mè amis Luis!
Gianfranco Gandini